გოლათუბანი
გოლათუბანი – მთიანი სოფელია საქართველოში, ზემო იმერეთში, ხარაგაულის მუნიციპალიტეტში. მდებარეობს მდინარე ჩხერიმელის მარჯვენა მხარეს.
ადგილობრივ მოსახლეობაში სოფლის სახელწოდების წარმომავლობის თაობაზე რამდენიმე ურთიერთგანსხვავებული გადმოცემა არის გავრცელებული. ზოგიერთის რწმენით გოლათუბანი გვალვა||გოლვა სიტყვისაგან ყოფილა წარმომდგარი: „აქა ყოფილა ხშირი გვალვაი“, ზოგის მიხედვით სოფელს „უმალ“ გორათ (ე.ი. მთების, გორების) უბანი რქმევია, შემდგომ კი გოლათუბანი „დოუთქმევიათ“. მოსახლეობის ერთი ნაწილი ზუსტად მიუთითებს ტოპონიმის წარმოშობას და თვლის, რომ გოლათუბანი „ვინცხა გოლა ყოფილა და მის სახელობაზე მოდის“, „გოლას შთამომავალთა უბანია“. ვარაუდი უთუოდ სწორია. ამაზე მეტყველებს არა მარტო ტოპონიმის საზღვრული ფუძე – უბანი (ეს სიტყვა უპირატესად გვართაგან მომდინარე ოიკონიმებში გვხვდება: ბარდუბანი (=ბარდაველიძეების უბანი), ლეჟუბანი (=ლეჟავების უბანი), ბეჟათუბანი, კაციტაძეების უბანი, ნადირაძეების უბანი თავაძეების უბანი, ჯიქთუბანი…), არამედ ისიც, რომ ზემო იმერეთის მიკროტოპონიმიაში ხშირად გვაქვს ადამიანის საკუთარ სახელთან (გვართან) დაკავშირებული ტოპონიმები: გოლაისოული სახნ. (სოფ. ბორი), ტყე (სოფ. ილემი), ხოლო სოფ. სპეთში ერთ-ერთ სერს ეწოდება გოლაციხე, რომელიც, ალბათ, გოლათ ციხსაგან მომდინარეობს (თუმცა ადგილობრივ გორაციხე-დ არის ცნობილიმასადამე გოლათუბან-ი ნიშნავს: „გოლაშვილების (გოლაძეების) სოფელი, „გოლას შთამომავალთა უბანი“.
