გულდი გლენ

გლენ გულდი

გულდი გლენ - Glenn Herbert Gould, (25. IX. 1932, ტორონტო, – 4. VII. 1982, იქეე), კანადელი პიანისტი, ორგანისტი, კომპოზიტორი. ა. გერეროსა (ფორტეპიანო) და ფ. სილვესტრის (ორგანი) მოწაფე. XX ს. ერთ-ერთი უდიდესი, ძალზე თვითმყოფი პიანისტი, რომლის შესრულებაც წარმოადგენდა რაციონალური და ნებისყოფითი საწყისებისა და ექსპრესიის ორგანულ შენადნობს. მიდრეკილებას იჩენდა დიდი ფორმებისადმი. სახელი გაითქვა როგორც ი. ს. ბახის (განსაკუთრებით), ლ. ბეთჰოვენის და XX ს. კომპოზიტორების ნაწარმოებების შესანიშნავმა შემსრულებელმა. მისი დებიუტი შედგა 1955 ვაშინგტონში, 1957-იდან გასტროლებს მართავდა მრავალ ქვეყანაში. 1960-ის მეორე ნახევრიდან ფაქტობრივად შეწყვიტა საკონცერტო გამოსვლები და შემოიფარგლა გრამჩანაწერებით, რომლებმაც კიდეც უფრო განამტკიცეს მისი არტისტული რენომე. ზოგჯერ გამოირჩეოდა ქცევის ექსტრავაგანტურობით, რის გამოც მას ჟურნალისტებმა „მუსიკალური ფიშერი“ (მსოფლიო ჩემპიონი ჭადრაკში) შეარქვეს. გულდი კამერულ-ინსტრუმენტული ნაწარმოების ავტორია. კანადაში დაწესებულია მისი სახელობის პრემია (1982). (გ. ტორაძე)

წყარო

მუსიკის ენციკლოპედიური ლექსიკონი