გრიგოლი (ოშკის ტაძრის მშენებელი)
გრიგოლი – ოშკის ტაძრის მშენებელი, მოღვაწეობდა X ს-ში. მოხსენიებულია ტაძრის დიდ სამშენებლო წარწერაში: „მე გრიგოლ ღირსმყო ღმერთმან მსახურებისა ამას მათსა ღმრთისა მიმართ, და მე ვიყავ საქმესა ზედა მდგომი“; ამავე წარწერაში მოხსენიებულ პირთა მიხედვით (ადარნასე III კურაპალატის ძენი – ბაგრატ ერისთავთერისთავი და დავით III დიდი კურაპალატი), წარწერა 958-961 წლებით თარიღდება; მუხლმოდრეკილი, ხელებაპყრობილი გრიგოლი გამოსახულია ტაძრის სამხრეთ გალერეაში, რელიეფებიან ბოძზე, ვედრების კომპოზიციის ქვეშ; ექვთიმე ღვთისკაცს (თაყაიშვილი) გამოთქმული აქვს მოსაზრება, რომ გრიგოლი შესაძლოა გრიგოლ ღვთისმეტყველის ზოგიერთი ნაწარმოების მთარგმნელი გრიგოლ ოშკელი იყოს.
ოშკის ტაძარი შუა საუკუნეების საქართველოს ერთ-ერთი უდიდესი საკულტო ნაგებობაა და მხატვრული და ისტორიული თვალსაზრისით ღირსეული ადგილი უკავია ქართული ხელოვნების ისტორიაში.
ვ. ბერიძე
ლიტერატურა
- ბერიძე ვ., ძველი ქართველი ოსტატები, თბ., 1967;
- თაყაიშვილი ე.,1917 წლის არქეოლოგიური ექსპედიცია სამხრეთ საქართველოში, თბ.,1960;
- მენაბდე ლ., ძველი ქართული მწერლობის კერები, ტ.1, ნაკვ. 2, თბ., 1962;
- ჯობაძე ვ., ადრეული შუა საუკუნეების ქართული მონასტრები ისტორიულ ტაოში, კლარჯეთსა და შავშეთში, თბ., 2007.