დასაქმება

დასაქმება

(employment) - შრომის საერთაშორისო ორგანიზაციის მიერ შემუშავებული კრიტერიუმების მიხედვით, დასაქმებულად ითვლება 15 წლისა და მეტი ასაკის მოსახლეობა, რომელიც დაკავებულია საზოგადოებრივად სასარგებლო საქმიანობით. არსებობს დაქირავებით დასაქმება და თვითდასაქმება. დაქირავებულ მუშაკად ითვლება პირი, რომელიც ასრულებს განსაზღვრულ სამუშაოს ანაზღაურების მიღების მიზნით, აგრეთვე პირი, რომელსაც აქვს სამუშაო ადგილი, მაგრამ დროებით არ მუშაობს ავადმყოფობის, შვებულებაში ყოფნის, სამუშაოდან დროებით დათხოვნის ან მსგავსი მიზეზების გამო. თვითდასაქმებულად ითვლება შინამეურნეობაში უსასყიდლოდ მომუშავე პირი, ან ის პირი, რომლის საქმიანობის მიზანს წარმოადგენს ფულით ან ნატურით საოჯახო შემოსავლის მიღება.

დასაქმების ბუნებრივი დონე

(natural level of employment) – დასაქმების დონე, როდესაც უმუშევრობა მისი ბუნებრივი დონის ტოლია.

დასაქმების დონე

(rate of employment) - დასაქმებულთა მთლიანი რიცხოვნობის შეფარდება ეკონომიკურად აქტიური მოსახლეობის რიცხოვნობასთან.

დასაქმებული მოსახლეობა

(employees) - შრომისუნარიანი ასაკის მოსახლეობა, რომელიც აღრიცხულია ქვეყნის კანონმდებლობაში განსაზღვრული შესაბამისი ნორმებით.

წყარო

თანამედროვე ეკონომიკის ენციკლოპედიური ლექსიკონი