ბერთის მამათა მონასტერი

წარწერის ტექსტი

ბერთის მამათა მონასტერი – სოფ. ბერთის (ყოფ. ოლიანკა) სამი მღვდელმთავრის მამათა მონასტერი (წალკის მუნიციპალიტეტი, წალკის ეპარქია). მდებარეობს ქ. წალკიდან 20 კმ-ზე, ზღვის დონიდან 1650 მ მცირე ზომის ტაძრის ძირში, საკურთხევლის ქვეშ, იქვე აღმოცენებული წყარო გადმოედინება (ტაძარი წყალზეა აგებული), სადაც მკურნალი კალმახები ბინადრობენ. ამ სასწაულმოქმედი ადგილისა და კალმახების შესახებ არაერთი გადმოცემა თუ ლეგენდა არსებობს. ერთ-ერთი გადმოცემის თანახმად, აღნიშნულ წყაროსთან ადრე დანგრეულ-დაშლილი საყდარი ყოფილა და იქაური სოფლის მკვიდრს (მისი სახელი უცნობია) მის ნაცვლად ახლის აშენება განუზრახავს და მალე აუგია კიდეც (აშენების თარიღი უცნობია).

აღსანიშნავია, რომ სასწაულმოქმედ წყაროსა და თევზებს ადამიანები ხელით ეხებიან და იკურნებიან. მონასტერი 2004 წლის სექტემბერში სრულიად საქართველოს კათოლიკოს-პატრიარქის, უწმინდესისა და უნეტარესის, ილია II-ის, ლოცვა-კურთხევით ამოქმედდა და მის პირველ წინამძღვრად არქიმანდრიტი დოროთე (ყურაშვილი) დაინიშნა, რომლის ხელმძღვანელობით მონასტერში უამრავი კეთილი საქმე გაკეთდა. სახელმწიფომ მონასტერს საკუთრებაში მიწის ფართობი გადასცა, რომელსაც სოფლის მოსახლეობის დახმარებით ამუშავებენ. აღორძინდა სოფლის მეურნეობის სხვადასხვა დარგი. არის მსხვილფეხა საქონლის დიდი ფერმა, სადაც ასევე ადგილობრივი მოსახლეობაა დასაქმებული, 2013 წლამდე მონასტერში 20-მდე ბერი იყო. ამჟამად ბერთის მამათა მონასტრის წინამძღვარია იღუმენი ნიკოლოზი (გვარლიანი). მონასტერში მოსაგრეობენ: ერთი ბერდიაკვანი და სამი ბერი, იქვე ახლოს არის ღვთისმშობლის მიძინების სახელობის დედათა მონასტერი, სადაც 10 მონაზონია. 2013 წლიდან ორივე მონასტერი ერთობლივად გამოსცემს ჟურნალს „მონასტრის ხმა“, რომელშიც ქვეყნდება ეკლესიის მამათა და ცნობილ ღვთისმეტყველთა თხზულებები და მათი განმარტებები.

გ. მაჩურიშვილი