ქვენიფნეველი პიპაჲ
პიპაჲ ქვენიფნეველი – გიორგი V ბრწყინვალის ინიციატივით, „კლიტენი იერუსალიმისან“-თან დაკავშირებით, ეგვიპტეში მოწყობილი დიპლომატიური მისიის ხელმძღვანელი.
„კლიტენი იერუსალიმისანი“, ანუ იგივე ქრისტეს საფლავის სალოცავის გასაღები მაჰმადიანთა ხელში რჩებოდა, რის გამოც საქართველოს მეფემ გიორგი V-მ „წინაშე ნისრელისა“ – ეგვიპტის სულთანთან თავისი ელჩები – პიპაჲ ქვენიფნეველი და იოანე ბანდაისძე წარგზავნა (როგორც ჩანს, ეს 1316-17-ში განხორციელდა; არსებობს მეორე თარიღიც – 1320). ქართველი დესპანები „გზასა ხმელთასა“, ეგვიპტის სულთანთან „მრავალთა ძღუენითა“ მისულან. ქართველ ელჩებს საქართველოს სამეფო კარიდან ეგვიპტის სულთანთან, სავარაუდო სხვა დიპლომატიური საკითხების გარდა, გამორჩეულად დავალებული ჰქონდათ „კლიტენი იერუსალიმისანის“ გადმოცემის გადაწყვეტა და ქართველთა უფლებრივი მდგომარეობის მოგვარება „წმინდა ადგილებში“, პიპაჲ ქვენიფნეველის მხრიდან გამოყენებულ იქნა ყველა დიპლომატიური შესაძლებლობა, რის შედეგადაც ეგვიპტის სულთანმა „სიხარულით შეიწყნარა ძღუენი იგი და მისცა „კლიტენი იერუსალიმისანი“, ამის დამადასტურებლად ქართულ მხარეს სულთანმა „იერლაყი შეწყალებისაჲ“ გადასცა, რომელიც ელჩმა, საქართველოში მობრუნების შემდეგ, გიორგი ბრწყინვალეს მიართვა. ასეთი წარმატების შემდეგ, „მივიდა პიპაჲ ზედა საფლავსა ქრისტესსა და შეემთხვა, ჟამი აწირვა, ეზიარა“, ხოლო ელჩობის მეორე მონაწილე – იოანე ბანდაისძე ქრისტეს საფლავის ტაძრის „მოძღუართ-მოძღერად“ აკურთსეს. საქართველოს ელჩმა პიპაჲ ქვენიფნეველმა „მოილოცნა წმიდანი ადგილნი და შეკრიბნა ნაწილი წმიდანი და ხატნი შუვნიერნი“. იგი საქართველოში „მასევ გზასა ხმელით“ დაბრუნდა. გიორგი მეფემ „ფრიად განიხარა“, რადგან მოხდა „აღსრულებაჲ ყოვლისა სათხოვლისა მისისაჲ“.
„კლიტენის“ – ქრისტეს საფლავის კომპლექსისა და „იერლაყი შეწყალებისაჲ“-ს საქართველოსათვის გადმოცემა საქართველო-ეგვიპტის სახელმწიფოთაშორისო შეთანხმება-ხელშეკრულებაზე, მოწესრიგებულ დიპლომატიურ კონტაქტებსა და ამ ურთიერთობების მდგომარეობის კიდევ უფრო გაუმჯობესებაზე მეტყველებს.
