პუბლიცისტის და ტელეკომპანია "მეცხრე არხის" ყოფილი თანამშრომლის ვასილ მაღლაფერიძის განცხადებით, "მეცხრე არხის" გადარჩენის ერთადერთი გზა სააქციო საზოგადოებაა. ამის შესახებ მაღლაფერიძემ "პრაიმტაიმის" პრესკლუბში გამართულ პრესკონფერენციაზე განაცხადა.
- მოსახლეობის და მათ შორის ჟურნალისტების ინტერესში შედის არხის სააქციო საზოგადოებად გადაქცევა. ტელევიზია საკმაოდ მომგებიანი ბიზნესია. ტელეკომპანია "მეცხრე არხი" იყო პოლიტიკური პროექტი და მან თავისი ფუნქცია უკვე შეასრულა - აცხადებს მაღლაფერიძე.
ვასილ მაღლაფერიძის შეფასებით, ქართულ მედიასივრცეში მიმდინარე პროცესები საყურადღებო და საგულისხმოა. როგორც მაღლაფერიძემ "პრაიმტაიმის" პრესკლუბში განაცხადა, "მაესტროს" დამფუძნებლის მამუკა ღლონტის განცხადებები საყურადღებოა.
- ყველანი ყურადღებით ვაკვირდებით ტელემედიაში მიმდინარე პროცესებს. ფაქტია, რომ ჩვენს რეალობაში ტელევიზიები ხშირად იქცევიან პოლიტიკის ნაწილებად. ყურადღება მისაქცევია მამუკა ღლონტის გაცხადებები, რომ ხელისუფლების ზოგიერთი ფრთა ცდილობს ხელში ჩაიგდოს ტელეკომპანია "მაესტრო". მოქმედი ჟურნალისტების ფუნქციაა საზოგადოებას აცნობონ, რა დგას ამის უკან? მე თვალი არ მიმიდევნებია ხუხაშვილის ბოლო განცხადებებისთვის, მაგრამ მამუკა ღლონტის განცხადებები ყურადღება მისაქცევია. ამიტომაც ჩვენ დიდი ყურადღებით უნდა მივადევნოთ თვალი ვინ და რა დგას ამის უკან - აცხადებს მაღლაფერიძე.
fs22cf3