(21-ს ქვევით, ჩოხატაური) - საქართველოში წინა კვირას განვითარებული მოვლენები, არა მარტო უფროს თაობაზე, არამედ, მოზარდებზეც აისახა. მაშინ, როცა თბილისში მომიტინგეები წყლის ჭავლით და ცრემლსადენი გაზით დაარბიეს პოლიციის და სპეცნაზის ნაწილებმა, სკოლის მოსწავლეებში პროტესტის გრძნობამ იფეთქა და ქუჩაში გამოიყვანა. მაშინ, როცა ქვეყანაში საგანგებო მდგომარეობა გამოცხადდა, სკოლებში კი - დასვნება, ჩოხატაურის რაიონის #1 საჯარო სკოლის უფროსკლასელები ქუჩაში საპროტესტო შეძახილებით გამოვიდნენ. მათ რაიონის ცენტრალურ ქუჩაზე ხელიხელჩაკიდებულებმა გაიარეს და ყოფილ კულტურის სახლთან შეიკრიბნენ, სადაც მათ შეხვდათ პოლიციის წარმომადგენლები და განათლების რესურსცენტრის ხელმძღვანელი ხათუნა წილოსანი, რომელმაც ბავშვებს მიმართა, სასწრაფოდ წასულიყვნენ სახლებში, რომ მათი კარგად ესმის, მაგრამ ახლა ასე არ შეიძლება, უნდა დაიშალონ და სახლებში წავიდნენ.
ბავშვები უკან კი მიტრიალდნენ, მაგრამ საპროტესტო შეძახილები განაგრძეს და რაიონის ცენტრისკენ დაიძრნენ. ცოტა ხანში უკვე პედაგოგებთან ერთად უკან მობრუნებულები, წმინდა გრიგოლ ხანძთელის სახელობის ეკლესიაში შეიკრიბნენ და ლოცვები წაიკითხეს.
ლოცვების შემდეგ ბავშვები ისევ სკოლაში მოიყარეს თავი, სადაც მათ პრეზიდენტის რწმუნებული გურიის მხარეში მიხეილ სვიმონიშვილი და გურიის სამხარეო პოლიციის მთავარი სამმართველოს უფროსი ბესო გელენიძე შეხვდნენ. როგორც თავად ბავშვებმა თქვეს, სვიმონიშვილი და გელენიძე მათ ქვეყნის დღევანდელი მდგომარეობის და ოპოზიციის ზოგიერთი ლიდერის შესახებ ესაუბრა. სიტუაციის ახსნა თავად ბავშვებს უთხოვიათ და საკმაოდ დაინტერესოდ ჩატარებულა შეხვედრა, რის შემდეგაც სკოლის მოსწავლეები და ხელისუფლების წარმომადგენლები კმაყოფილნი დაშორდნენ ერთმანეთს.