18 დეკემბერს ცისფერ გალერეაში გაიმართა სტუდენტური ფილმებისა და სპექტაკლების ფესტივალ "დებიუტის" დასკვნითი ეტაპი, ანუ გამარჯვებულთა გამოვლენისა და პრიზების გადაცემის ცერემონიალი.

ფესტივალი 9 დეკემბერს გაიხსნა. მისი ორგანიზატორი შოთა რუსთაველის სახელობის თეატრალური ინსტიტუტის სტუდკავშირი იყო. ფესტივალზე წარმოდგენილი იყო სხვადასხვა სასწავლებლების სტუდენტთა ნამუშევრები: შოთა რუსთაველის სახელობის თეატრალური ინსტიტუტის, თსუს, ტექნიკური უნივერსიტეტის, ტელე-რადიო ინსტიტუტის და სხვადასხვა სახელოსნოების სტუდენტთა ნამუშევრები.

ფესტივალზე წარმოდგენილ ნამუშევრებს ორი ჟიური აფასებდა: კინოჩვენებებისა და სპექტაკლების შემფასებელი ჟიურები. სპექტაკლებისა და ფილმების ჩვენებები ათი დღის განმავლობაში მიმდინარეობდა.

ჩვენ გავესაუბრეთ კინოჩვენებების ჟიურის თავმჯდომარეს, გიორგი ნავროზაშვილს. კითხვაზე: რა პრინციპით მუშაობს ჟიური, როგორია ნამუშევართა შეფასების კრიტერიუმი, ბატონმა გიორგიმ გვიპასუხა: "მთავარია გემოვნება, ნაწარმოების ხედვა, როგორ გრძნობს სტუდენტი მთლიანობას და როგორ ქმნის იგი მხატვრულ სახეს".

ფესტივალზე დაწესებული იყო პრიზები შემდეგ ნომინაციებში: საუკეთესო მეორეხარისხოვანი როლისთვის, იდეის საუკეთესოდ წარმოჩენისათვის, ორიგინალური გადაწყვეტისათვის, სტილისტური გადაწყვეტისათვის, საუკეთესო მუსიკალური გაფორმებისთვის, საუკეთესო სტენოგრაფიისა და საუკეთესო ოპერატორული ნამუშევრისთვის.

პრიზებს გადასცემდნენ: გიგა ლორთქიფანიძე, მურმან ჯინორია, ნანა ჯანელიძე და ჟიურის სხვა წევრები.

ფესტივალის გრან-პრი მიენიჭა სპექტაკლს: "ვინ არის დამნაშავე", რომლის დამდგმელი რეჟისორია სოსო ნემსაძე.

საუკეთესო კინოფილმად აღიარეს რუსუდან ჭყონიას ნამუშევარი - "მათ სახელი არ გააჩნიათ - ბედიანი". ფილმი ჩვენი სინამდვილის მწარე რეალობას ასახავს. იგი მოგვითხრობს ქუჩაში უპატრონოდ დარჩენილი, გამათხოვრებული ბავშვების შესახებ.

"მათ სახელი არ გააჩნიათ - ბედიანი" - რუსუდან ჭყონიას სადიპლომო ნამუშევარია. ჩვენთან საუბრისას მან აღნიშნა, რომ ფილმს მიღებული აქვს ვერცხლის მედალი ლუქსემბურგში და გრან-პრი - ჩეხეთში.

ფესტივალის დასასრულს ცნობილმა ქართველმა რეჟისორმა, გიგა ლორთქიფანიძემ, მიულოცა გამარჯვებულ სტუდენტებს წარმატება და აღნიშნა, რომ იგი მიესალმება ასეთი ღონისძიებების ყოველწლიურად ჩატარებას.