ვახტანგ ბარბაქაძე

   ვახტანგ ბარბაქაძე დაიბადა 1908 წელს ზესტაფონის რაიონის სოფელ ქვედა საქარაში. ზესტაფონის საშუალო სკოლის 7 კლასის დამთავრების შემდეგ სწავლა განაგრძო ზესტაფონის სამრეწველო ეკონომიკურ ტექნიკუმში, რომელიც დაამთავრა 1928 წელს და ჩააბარა საქართველოს სახელმწიფო უნივერსიტეტის აგრონომიული ფაკულტეტის მებაღეობა– მევენახეობის დარგზე. 

   უნივერსიტეტის დამთავრების შემდეგ, 1937 წლამდე, მუშაობდა ვარციხის საბჭოთა მეურნეობაში უმცროს აგრონომად, უფროს მევენახედ და მეურნეობის დირექტორად. 1947–1951 წლებში მუშაობას აგრძელებს მუხრანის საბჭოთა მეურნეობაში აგროსაწარმოო განყოფილების უფროსად და, შემდეგ, დირექტორის მოადგილედ. 1955 წლამდე იგი მუშაობდა ზესტაფონის ღვინო–არყის ქარხნის დირექტორად, 1956 წლამდე – ქუთაისის ღვინის ქარხნის დირექტორად და 1969 წლამდე ზესტაფონის N1 ღვინის ქარხნის დირექტორად და ზესტაფონის ქარხნის სამმართველოს დირექტორად.

   ვახტანგ ბარბაქაძეს მინიჭებული ჰქონდა საქართველოს დამსახურებული მეღვინის საპატიო წოდება, იყო რესპუბლიკური მნიშვნელობის პერსონალური პენსიონერი, მიღებული ჰქონდა მთავრობის ჯილდოები.

   ბატონი ვახტანგი გარდაიცვალა 1984 წელს.

   წყარო: გახსენება: საქართველოს მეღვინეობა-სამტრესტი, მისი ხელმძღვანელები, გარდაცვლილი სპეციალისტები / ალექსანდრე ქურდაძე; თბილისი: ღვინის სახლი, 1999. - 115 გვ.