იოსებ ნიკოლოზის ძე თუმანიშვილი

დაიბადა ქ. გორში. 1893 წელს დაამთავრა მოსკოვის უნივერსიტეტის სამედიცინო ფაკულტეტი. დახელოვნდა ვარშავის, ბერლინისა და ვენის გინეკოლოგიურ კლინიკებში, პროფ. ვ. ფ. სნეგირევის მოწაფე, მედიცინის მეცნიერებათა დოქტორი, პროფესორი. გამოჩენილი მეან-გინეკოლოგი, საქართველოს სსრ დამსახურებული ექიმი (1941). სხვადასხვა დროს მუშაობდა თბილისის მიხეილის საავადმყოფოსა და ამიერკავკასიის ოლღას სახელობის სამეანო ინსტიტუტის გინეკოლოგიური განყოფილების გამგედ, საქართველოს სსრ ჯანმრთელობის დაცვის სამინისტროს დედათა და ბავშვთა ჯანმრთელობის დაცვის სამეცნიერო-კვლევითი ინსტიტუტის დირექტორად, ევაკოჰოსპიტლის განყოფილების გამგედ. მისი შრომები ეხება მეანობა-გინეკოლოგიის აქტუალურ საკითხებს, ბადექონის შემწოვ თვისებებს, ფიბრომიომურ საშვილოსნოში ორსულობის გართულებებს და სხვა.