იოსებ კონსტანტინეს ძე აბაკელია

დაიბადა ქ. ქუთაისში. ნოვოროსიის (ოდესის) და მოსკოვის უნივერსიტეტების სამედიცინო ფაკულტეტის აღზდილი (დაამთავრა 1911 წელს). გამოჩენილი ფტიზიატრი. დახელოვნდა გერმანიის და ფინეთის ტუბერკულოზის საწინააღმდეგო სამკურნალო დაწესებულებებში. აკად. ა. ალადაშვილის მოწაფე. მედიცინის დოქტორი, სადისერტაციო შრომა - „ტუბერკულოზის ლიმფური გზით გავრცელების ანატომიური დასაბუთების მასალები" (1924). პროფესორი, თბილისის ექიმთა დახელოვნების სახელმწიფო ინსტიტუტის ტუბერკულოზის კათედრის გამგე, ტუბერკულოზის სამედნიერო-კვლევითი ინსტიტუტის ორგანიზატორი ქ. თბილისში, ქართულ ფტიზიატრთა სკოლის ფუძემდებელი. მისის შრომები ეხება ფილტვების ქრონიკული ტუბერკულოზის დიაგნოსტიკისა და მკურნალობის საკითხებს.

1938 წელს დააპატიმრეს. ბრალად ედებოდა რომ იყო ესერების ანტისაბჭოთა ორგანიზაციის ხელმძღვანელი მონაწილე და ეწეოდა ინტენსიურ ძირგამომთხრელ საქმიანობას, იღებდა მონაწილეობას ტერაქტების მზადებაში საბჭოთა კავშირის კპ(ბ)-ს ხელმძღვანელობისა და საბჭოთა ხელისუფლების წინააღმდეგ და ეწეოდა აქტიურ ჯაშუშურ საქმიანობას უცხო სახელმწიფოების სასარგებლოდ. სასჯელის ზომა: დახვრეტა, პირადი ქონების კონფისკაცია. რეპრესირებულია. სიკვდილის შემდეგ რეაბილიტირებულია.