ოთარ დიხამინჯია

დაბადების ადგილი: ქ. ქუთაისი.

დაამთავრა თბილისის სახელმწიფო სამედიცინო ინსტიტუტი 1935 წელს(სამკურნალო).

ჯერ კიდევ მოსწავლეობის დროს ჩაირიცხა სოხუმის კავშირების სახლის მომღერალთა გუნდის სოლისტად, თან სკოლის მომღერალთა გუნდს ხელმძღვანელობდა; ინსტიტუტში სწავლის პირველი სამი წლის განმავლობაში მომღერალთა გუნდსა და ვოკალურ ჯგუფებს ხელმღვანელობდა; 1933 წელს ჩაირიცხა პოლიკარპე ფალიაშვილის ხელმძღვანელობით ჩამოყალიბებულ კონსერვატორიაში შემსვლელთა კურსებზე, სადაც მცირე ხანს იმეცადინა, რადგან რაიონში გაგზავნეს ექიმად; მღეროდა მიხეილ კავსაძის გუნდში და თან სხვადასხვა რაიონებში მომღერალთა გუნდებსა და ვოკალურ ჯგუფებს აყალიბებდა; 1948 წლიდან იყო ბანძაში; მკურნალობდა ავადმყოფებს და თან საყვარელ საქმეს - სიმღერას არ ივიწყებდა; ბანძის კლუბში ჩამოაყალიბა მომღერალთა გუნდი, რომელიც წარმატებით გამოდიოდა სარაიონო, ზონალურ და რესპუბლიკურ დათვალიერებებზე, რადიოთი ხშირად გაისმოდა ამ გუნდის შესრულებით ჩაწერილი სიმღერები; 1953 წელს სხვა ლოტბარებთან ერთად საგუნდო-სადირიჟორო კურსები გაიარა; გეგეჭკორის რაიონის პიონერთა და მოსწავლეთა სარაიონო სახლის მომღერალთა გუნდსაც დიდ ყურადღებას უთმობდა; 1957 წელს გეგეჭკორის რაიონის სიმღერისა და ცეკვის ახალგაზრდულ ანსამბლს ახალგაზრდობის რესპუბლიკურ ფესტივალზე მეორე ხარისხის დიპლომი მოაპოვებინა; თვითმოქმედ კომპოზიტორს მრავალი სიმღერა აქვს შეთხზული, მისი სიმღერებია: "მერცხალი", "გახსოვს, მერი", "ჩემთან მოდი", "გაზაფხული", "ბულბული", "ჩემო ქვეყანავ", "ვუმღერით თბილისს", "პიონერული სიმღერა", "საკოლმეურნეო სიმღერა"; მათ წარმატებით ასრულებდნენ ხალხურ საკრავთა ორკესტრები, ვოკალური ტრიოები, კვარტეტები, ოპერის სოლისტები; ცალკე არის გამოცემული "მერცხალი" და "გახსოვს, მერი", ხოლო ზოგი სიმღერა სასკოლო სწავლების პროგრამაშია შეტანილი; ექიმი, მომღერალი, ფოლკლორისტი, ლოტბარი.