დავით მერაბის ძე გამყრელიძე

    დავით აწყურელი დაიბადა 1863 წლის 12 აპრილს თელავის მაზრის სოფელ აწყურში.

   1885 წელს, ვასო აბაშიძის ხელშეწყობით, პირველად გამოვიდა სცენაზე. იგი დიდი ოსტატობით ასრულებდა კომიკურ როლებს, რის გამოც „ივერია“ მუდამ ქებით იხსენიებდა: „მარტო ერთი არტისტიღა გამოჩნდა იმ წარმოდგენაზე („ჰამლეტი“), რომელიც არამც თუ შესწვდა თავის როლსა, არამედ მშვენივრად და ხელოვნურობით გამოსახა. ეგ არტისტი ბ-ნი აწყურელი იყო მესაფლავის როლში. ძალიან კარგი რამ იყო მისი ლაპარაკი და თამაშობა საგანგებო რამ იყო“ („ივერია“, 1887, N 36).

   1896-1906 წლებში დროგამოშვებით ქუთაისის სცენაზე მუშაობდა. ხშირად თელავის თეატრში და სოფლებში თამაშობდა. რამდენიმე სეზონი თბილისის მთავარ სცენაზეც მოღვაწეობდა და რაღაც პერიოდი ბაქოს სცენის მოყვარეთა დასშიც სრულიად უსასყიდლოდ მუშაობდა და სათეატრო საქმიანობის წარმატებას ხელს ძლიერ უწყობდა. 

   1910 წელს დავით აწყურელს თელავში მოღვაწეობის 25 წლის იუბილე გადაუხადეს. 1922 წლიდან თვალის ჩინი დაკარგა და უსინათლო დარჩა. ცხოვრობდა უკიდურეს გაჭირვებაში.

   დავით აწყურელი გარდაიცვალა 1928 წლის 9 აპრილს და დაკრძალულია თელავში.

• ქართველთა შორის წერა-კითხვის გამავრცელებელი საზოგადოება, საზოგადოების ბაქოს განყოფილების წევრი (1915-)

• "ქართველ მოღვაწეთა ლექსიკონი" : იოსებ იმედაშვილი // I ტომი. - თბილისი, ეროვნული ბიბლიოთეკის გამომცემლობა, 2018. - გვ. 239