მოუბილდება (?)

ბევრ თავადს მოუბილდება
ჩემებრივ აზნაურობა.

ამ ლექსის თქმა უყვარდა თურმე მამაჩემის გარეთა ბიძას. რომელიც შეძლებული და განათლებული კაცი ყოფილა.

კარგახანს დანამდვილებით არ ვიცოდი, ვისი იყო ეს სიტყვები, სანამ არ ვნახე იოსებ თბილელის „დიდმოურავიანში“.

კარგ კაცთა წყობა ალერსი,
მდიდართა მე უშიშრობა,
ვეჭვ, ზოგს თავადსაც მოსწადეს
ჩემებრივ აზნაურობა!

ი. თბილელის პოემის ამ სტროფის მესამე და მეოთხე სტრიქონისა და ჩემს მიერ დამახსოვრებული ფრაგმენტის აზრი ერთია. უნდა ვიფიქროთ, რომ ეს ფრაგმენტი „დიდმოურავიანიდან“ მოდის, მაგრამ რას ნიშნავს სიტყვა: „მოუბილდება“, არის თუ არა ასეთი სიტყვა ქართულში?

იქნებ ეს ფრაგმენტი დიდგვარიან თავადთა მოქიშპე აზნაურთა წრეებში გავრცელებული თქმა იყო და ი. თბილელმა თავის პოემაში გამოიყენა. თუ გაუგებარი „მოუბილდება“-ს მნიშვნელობა გმოირკვევა, თუ იგი არქაული სიტყვა აღმოჩნდება, ეს ვარაუდი საეჭვოდ აღარ მოგვეჩვენება.

აქვე უნდა ითქვას, რომ ი. თბილელის პოემის სტროფი დამახინჯებული უნდა იყოს. ეჭვს იწვევს: „მდიდართა მე უშურობა“.