უბის ფარი

(ხევს.) - ხევსურეთის ეთნოგრაფიულ სინამდვილეში დამოწმებულია უბის ფარი,რომელიც ჩვეულებრივ ფართან შედარებით მცირე ზომისაა. უბის ფარიც მრგვალი მოყვანილობისაა, (დმ.დაახ. - 20 სმ.) უბის ფარის მასალად მხოლოდ ლითონია გამოყენებული. ფარის ზედაპირზე, შუაგულში დაკ რულია ოთკუთხი ფორმის რკინა - „გუმბათის ხატი“, რომლის კუთხეები წაწვეტებულია ოთხი „შოლტით“. ამ ოთხ შოლტს ზევიდან წრიულად შემოვლებული აქვს ერთი რკალი - „გირგოლი,“ რომელიც დამაგრებულია სამსჭვალებით. უბის ფარი ზურგიდან ლითონგადაკრულია. მას ჩოხის ქვეშ ატარებდნენ გულ-მკერდის დაცვის მიზნით, მაგრამ საბრძოლველადაც იყენებდნენ: იმ შემთხვევაში, როდესაც მებრძოლს არ გააჩნდა სხვა საბრძოლო იარაღი და მოუხდებოდა ვინმესთან „შუღლი,“ ამოაძრობდა უბეში საბღუჯით ჩოხისკენ მოქცეულ ფარს და მოწინააღმდეგეს „ჩააფარებდა“, შესაძლოა აქედან მომდინარეობდეს ტერმინი „ჩაფარება“.
ლიტ.: კ.ჩოლოყაშვილი, ქართული საბრძოლო იარაღი, ფარი, სსმმ. ტ.XVIIIნ 1954.
მ.ქ.