ლეონიძე გიორგი
ნინოწმინდის ღამე
|
1926 წლის 26 მარტი.
ღამე ნინოწმინდის გალავანში:
სანდრო შანშიაშვილი, პაოლო იაშვილი,
ტიციან ტაბიძე, გიორგი ლეონიძე. |
|
|
ნინოწმინდა... პალატები მეფეთა...
გალავანში ― ჯამი აქაფებული,
შენი სახე რისთვის შემომეფეთა,
ხატი იყავ ― ვეფხვი დაქალებული... |
|
ნინოწმინდა - სოფელი კახეთში, საგარეჯოს რაიონში. ნინოწმინდის გალავნიანი სამონასტრო კომპლექსი მე-6 საუკუნეშია ნაგები. მონასტრის უმდიდრეს ბიბლიოთეკაში მოღვაწეობდა ექვთიმე ათონელის თანამოსაგრე არსენ ნინოწმინდელი (XI ს.)
პალატი - დიდებულთა საცხოვრებელი შენობა, სასახლე; სასახლის დარბაზი. |
|
|
|
|
საზანდარმა
ღამე ააცახცახა,
ავთანდილის მწვადი ცეცხლზე შხიოდა,
ცა-ატმებით მსხმოიარე, ჩახჩახა,
და გაზაფხულს რძის სუნი ასდიოდა... |
|
საზანდარი - 1. მესტვირე; 2. თარზე, ჭიანურზე, დაირასა და საზზე დამკვრელ მუსიკოსთა დასი. |
|
|
|
|
ნინოწმინდა... ჩვენ როგორც ხაზარები...
ოჰ, იმ ღამეს როგორ აგვაბრიალა
საქართველოს ლექსის მეხანძარენი
ძმობამ, ცრემლმა, სიყვარულის იარამ! |
|
|
|
|
|
|
როგორც ხმალი, ძმებო,
ტამერლანისა,
სიყვარული ისე დამჯახებია!
მე მივტირი ღამეს ზამბახებიანს
და სიყვარულს ათაბაგის ქალისას; |
|
ტამერლანი - თემურ-ლენგის სახელის რუსული (ევროპული) ტრანსკრიფცია. |
|
|
|
|
ძუძუები ოქროს კალმახებია,
წამწამები აქვს თავთუხის ყანისა...
წინანდალის ვაზი აყვავებული,
ჩამოსხმული ოქროთი და თაფლითა, |
|
|
|
|
|
|
აფრენილი
ბაზიერის დაფითა,
დურაჯი ხარ, მაყვალს შეფარებული!
ნინოწმინდა... ჩვენ როგორც ხაზარები...
ოჰ, იმ ღამეს როგორ აგვაბრიალა
საქართველოს ლექსის მეხანძარენი
ძმობამ, ცრემლმა, იმ პატარა იარამ |
|
ბაზიერი (სპარს.) - ქორ-შავარდენთა დამგეშველი.
დურაჯი - ქათმისებრთა ოჯახის პატარა, ლამაზი ფრინველი. |
