ნინელი ვარდიაშვილი

დაბადების ადგილი: ქ. თბილისი.

დაამთავრა თბილისის რკინიგზის ტრანსპორტის ინჟინერთა ინსტიტუტის ხიდებისა და გვირაბების ფაკულტეტი და მიენიჭა ინჟინერ-მშენებლის კვალიფიკაცია 1957 წელს.

ინსტიტუტის დამთავრების შემდეგ მუშაობდა ქ. ისეცკის (სვერდლოვსკის ოლქი) რკინაბეტონის კონსტრუქციების ქარხანაში - ინჟინრად; საქართველოში დაბრუნების შემდეგ, 1959 წელს მუშაობა დაიწყო საქართველოს მშენებლობის სამინისტროს №1 სამშენებლო ტრესტ "ამიერკავკასმეტალურგმშენში", ჯერ საპროექტო განყოფილების ინჟინერ-კონსტრუქტორად, შემდეგ უფროს ინჟინრად, ჯგუფის ხელმძღვანელად; 1964-1998წწ. მუშაობდა ზონალურ სამეცნიერო-კვლევით და ექსპერიმენტული პროექტირების ინსტიტუტში ("თბილზნიეპი") ჯგუფის ხელმძღვანელად, პროექტის მთავარ კონსტრუქტორად; 1974 წლიდან ინდუსტრიული სამშენებლო კონსტრუქციების განყოფილების მთავარი კონსტრუქტორი იყო; მნიშვნელოვანი წვლილი მიუძღვის მშენებლობის სფეროში სეისმომედეგი, უნიფიცირებული, კარკასულ-პანელოვანი, ანაკრები რკინაბეტონის კონსტრუქციების დამუშავებაში და მათი მშენებლობაში დანერგვის საქმეში; ავტორთა ჯგუფთან ერთად დაამუშავა "იის-04" და "1,020.1 - 2C" სერიის უნიფიცირებული, ანაკრები რკინაბეტონის სეისმომედეგი კონსტრუქციები მაღლივი (16 და 18 სართულიანი), კარკასულ-პანელოვანი საცხოვრებელი სახლებისა და საზოგადოებრივი დანიშნულების შენობებისათვის; ასევე "1.120.1 - 2C" სერიის კარკასულ-პანელოვანი კონსტრუქციები, მშენებლობის პირობებში არმატურის დაჭიმვის გამოყენებით; წლების განმავლობაში ამ კონსტრუქციების გამოყენებით, ყოფილი საბჭოთა კავშირის ტერიტორიაზე, 7, 8 და 9 ბალიან სეისმურ ზონებში აშენდა ათასობით მრავალსართულიანი საცხოვრებელი სახლები და საზოგადოებრივი დანიშნულების შენობები - ქ. თბილისში, ქ. ქუთაისში, აფხაზეთის და აჭარის ავტონომიურ რესპუბლიკებში, ქ. სოჭში, სტავროპოლის მხარეში, კემეროვოს, ორენბურგისა და მურმანსკის ოლქებში, ქ. ნევინომინსკში და სხვაგან; ავტორთა ჯგუფთან ერთად ამუშავებდა საკავშირო და რეგიონალურ კატალოგებს, კონსულტაციას უწევდა და თანამშრომლობდა 400-მდე საპროექტო ორგანიზაციასთან, 130-მდე სამშენებლო ტრესტთან  და 80-მდე რკინაბეტონის ნაკეთობების ქარხანასთან; მონაწილეობდა სემინარებსა და კონფერენციებში, მონათესავე კიევის ზონალური ინსტიტუტის (კიევზნიეპის) და ქ. ბელგრადის "სერბეთის სამშენებლო მასალების ინსტიტუტის" სპეციალისტებთან; მონაწილეობდა ქ. სპიტაკში (სომხეთი) მიწისძვრის შედეგად დაზიანებული შენობების ექსპერტიზაში, ასევე სამაჩაბლოში, მიწისძვრით დაზარალებული რაიონების შენობა-ნაგებობების გაძლიერება-აღდგენის პროექტების დამუშავებაში; "იის-04" სერიის სეისმომედეგი, უნიფიცირებული, ანაკრები რკინაბეტონის, კარკასულ-პანელოვანი კონსტრუქციების, მაღლივი (16 და 18 სართულიანი) საცხოვრებელი სახლებისა და საზოგადოებრივი დანიშნულების შენობა-ნაგებობებისათვის, დამუშავებისა და ათვისება-დანერგვაში შეტანილი წვლილისათვის 1980 წელს მიენიჭა საქართველოს მინისტრთა საბჭოს პრემია.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 120-121