ნესტორ ერქომაიშვილი

დაბადების ადგილი: სოფელი წითელმთა, ოზურგეთის რაიონი, შემოქმედის თემი.

1903 წლიდან იყო რსდმპ გურიის ორგანიზაციის და რევოლუციური მოძრაობის აქტიური წევრი, შემოქმედის თემის სამხედრო წარმომადგენელი და წითელი რაზმის მეთაური; 1905-1909 წლებში ბათუმის სოციალ-დემოკრატიული პარტიის ორგანიზაციის მხრიდან გლეხთა და მებრძოლთა შორის ავრცელებდა არალეგალურ ლიტერატურას და ეწეოდა აგიტაციას. ნესტორ ერქომაიშვილმა სხვა თანამებრძოლებთან ერთად განაიარაღა ოზურგეთის პოლიციის სამაზრო სამმართველოს 30-მდე სტრაჟნიკი, ბათუმში 7 "გოროდოვოის" იარაღი აჰყარა. 1905 წელს მონაწილეობდა ნასაკირალში კაზაკებთან შეტაკებაში და გენერალ ალიხანოვ-ავარსკის წინააღმდეგ საბრძოლო მოქმედებებში ოზურგეთში. გენერალი ალიხანოვ-ავარსკი ნესტორ ერქომაიშვილს და მის ოჯახს სდევნიდა და აწიოკებდა, ამიტომ იგი 1906 წლის 17 მარტს თვითონ ჩაბარდა, გაასამართლეს და ქუთაისის ციხეში ჩასვეს; 1908 წელს გაასამართლეს მეორედ, იჯდა ოდესის ციხეშიც. 1914-1917 წლებში გადასახლებული იყო ციმბირში, ენისეისკის გუბერნიის სოფელ ტარეევოში. რევოლუციის შემდეგ საქართველოში დაბრუნდა, იყო პოლიტკატორღელთა საზოგადოების წევრი (№1661). "გურიის რესპუბლიკის" ერთ-ერთი მომხრე.

 წყარო: ქართველ მოღვაწეთა ლექსიკონი, 1801-1952: ტ. II ე-ლ / იოსებ იმედაშვილი.-თბ.,2021.-გვ.100