როლანდ რიჩკოვი

დაბადების ადგილი: სოფელი ხრიალეთი, მახარაძის რაიონი (ახ. ოზურგეთის მუნიციპალიტეტი).

დაამთავრა ბათუმის საზღვაოსნო სასწავლებლის გემთმექანიკური განყოფილება 1964 წელს; ოდესის საზღვაო ტრანსპორტის ინსტიტუტი ინჟინერ-გემთმექანიკოსის სპეციალობით 1975 წელს.

სოფელ შრომის საშუალო სკოლის დამთავრებისთანავე 1958 წელს იგი ბათუმში ჩავიდა და საქმიანობა სანავსადგურო ფლოტის გემ «ბორის ძნელაძის» მატროსად დაიწყო; სასწავლებელის დამთავრების შემდეგ გემთმექანიკოს-უნივერსალის კვალიფიკაციით განაწილებით ჯერ შავი ზღვის, შემდეგ კი ნოვოროსიისკის საზღვაო სანაოსნოებში მოხვდა სამუშაოდ; 1964-1970 წწ. მეოთხე, მესამე და მეორე რანგის მექანიკოსად ცურავდა «Ужгород»-ზე, «Ростов»-სა და  «Чкалов»-ზე, 1970 წელს კი როლანდ რიჩკოვი ბათუმში დაბრუნდა და საქართველოს საზღვაო სანაოსნოს  შორეული ნაოსნობის გემების: «Николоз Бараташвили»-ს, «Керчь»-ისა და ბალკერ «Нико Николадзе»-ს მეორე მექანიკოსად განაგრძო ზღვაში საქმიანობა; 1973 წელს მცირე ხნით ნაპირზე, სანაოსნოს თბოგანყოფილების ინჟინრადაც მუშაობდა, პარალელურად სწავლობდა ოდესის საზღვაო ტრანსპორტის ინსტიტუტში; 1976 წელს  როლანდ რიჩკოვი ტანკერ «Кутаиси»-ს უფროს მექანიკოსად დაინიშნა; 1979 წლიდან იგი კვლავ ნაპირზე საქმიანობს და საქართველოს საზღვაო სანაოსნოში არაერთ საპასუხისმგებლო მოვალეობას ასრულებს; 1983 წლამდე იგი თბოტექნიკის საგამოცდო პარტიის, სანაოსნოს ტექნიკური სამსახურის (1984-1988) და დიაგნოსტიკის ლაბორატორიის (1990-1997) უფროსი, 1998-2003 წწ. როლანდ რიჩკოვი საქართველოს საზღვაო სანაოსნოს სუპერინტენდანტია; 2003-2010 წწ. საჯარო სამსახურშია და  განათლების და მეცნიერების მიმართულებით საქართველოს საზღვაო ტრანსპორტის ადმინისტრაციის თავმჯდომარის მრჩეველის მოვალეობებს ასრულებს; ზღვაში მოღვაწეობის მრავალწლიანი გამოცდილების მქონე პროფესიონალი გემების ტექნიკური ექსპლუატაციის შესახებ მომზადებული არაერთი სამეცნიერო-ტექნიკური შრომის, საზღვაო ტექნიკური ტერმინოლოგიისა და სამენოვანი საზღვაო ლექსიკონის ავტორია; 2010 წლიდან პედაგოგიურ მოღვაწეობას ეწეოდა ბათუმის ნავიგაციის სასწავლო უნივერსიტეტში. პროფესორი, ამ უმაღლესი საზღვაო სასწავლებლის  გემთმექანიკის კათედრის გამგე, შორეული ნაოსნობის გემების უფროსი მექანიკოსი.

წყარო: პაატა ტაბაღუას საავტორო გვერდი: "საქართველო საზღვაო ქვეყანაა": facebook.com

• 2003 - ღირსების ორდენი
• 2003 - საზღვაო ფლოტის საპატიო მუშაკი
• 1989 - შრომის ვეტერანის მედალი

• საზღვაო ლექსიკონი = Морской словарь = Maritime dictionary : რუსულ-ინგლისურ-ქართული, ინგლისურ-ქართულ-რუსული, ქართულ-რუსულ-ინგლისური : დაახლოებით 3x15000 ტერმინი (შემდგენელი). - თბილისი, შპს "კვარი", 2010. - 762გვ.