ვახტანგ ბატონიშვილი

ვახტანგ ბატონიშვილი(ბაგრატიონი) იყო იმერეთის მეფის ალექსანდრე II-ის ძე. თავისი უფროსი ძმის, იმერეთის მეფის ბაგრატ III-ის მმართველობის პირველ წლებში უკმაყოფილო ვახტანგ ბატონიშვილი ამალით ქართლს გაიქცა. მეფე დაედევნა და 1512 წელს მოხისთან დაამარცხა იგი. ქართლის მეფის დავით X-ის შუამდგომლობით ძმები შერიგდნენ. შემდეგში ვახტანგ ბატონიშვილი მეფის პოლიტიკის ერთგული მიმდევარი იყო. 1547 წელს, როდესაც ოსმალები გურიაში შეიჭრნენ, როსტომ გურიელმა დახმარებისათვის მიმართა ბაგრატ III-ს და ლევან I დადიანს. ბაგრატმა გურიელს ვახტანგ ბატონიშვილის  მეთაურობით 500 მხედარი მიაშველა, მაგრამ რადგან დადიან-გურიელის შეერთებაში საფრთხეს ხედავდა, ვახტანგს დაავალა, არ დაეშვა მთავართა გაერთიანება. ვახტანგმა წარმატებით შეასრულა ძმის დავალება, დადიანს შეუთვალა – "ჩემ ძმას და გურიელს პირი აქვთ შეკრული, თუ შეიკრიბნეთ... მოგაკვდინებენ ანუ შეგიპყრობენ". დადიანი შეშინდა და უკან გაბრუნდა.

წყარო: საქართველო: ენციკლოპედია: ტ.III.–თბ., 2014.-გვ.227