მიხეილ დავითაშვილი

მოღვაწეობდა XVIII საუკუნის I ნახევარში; იყო ნიკოლოზ ბატონიშვილის ამალაში მყოფ დავითაშვილთა შთამომავალი, ალექსანდრე არჩილის ძის ცოლისძმა; განათლება მიიღო მოსკოვში, დაეუფლა სამხედრო საქმეს; 1722 წელს მოსკოველ ქართველთა რაზმთან ერთად მონაწილეობდა რუსეთის ჯარის კასპიისპირეთის ლაშქრობაში; 1725 წელს პეტერბურგში პირველი ჩასვლის დროს ეახლა ვახტანგ VI–ს; მან მეფე ბაქარის წინადადებით თარგმნა "ვაკაფა" – რუსულ–ქართული სასაუბრო; იმავე 1725 წელს მან რუსული და უცხოური ლიტერატურის საფუძველზე შეადგინა მეორე სასწავლო წიგნი  – "მცირე რამ გამოკრებილი ანგარიშის ცოდნისა", რომელიც გაასწორა და განავრცო ვახტანგ VI-მ; ეს იყო ქართულ ენაზე შედგენილი ევროპული ტიპის სახელმძღვანელო მათემატიკაში; მისი ხელნაწერები დაცულია თბილისში, საქართველოს მეცნიერებათა აკადემიის ხელნაწერთა ეკონომიკურ ცენტრში, სანქტ–პეტერბურგში, სალტიკოვშჩედრინის სახელობის სახელმწიფო საჯარო ბიბლიოთეკის იოანე ბატონიშვილის პირველი კოლექცია, ხელნაწერი N313.

წყარო: საქართველო: ენციკლოპედია: ტ.2. – თბ., 2012. – გვ.278