ალექსანდრე ჯანელიძე

დაბადების ადგილი: სოფელი ნიკორწმინდა, ამბროლაურის რაიონი.

დაამთავრა პარიზის სორბონის უნივერსიტეტი 1910 წელს, 1916 წელს – ყაზანის უნივერსიტეტი.

1911-1915წწ. მასწავლებლობდა ქუთაისში, 1918-1920წწ. კი თბილისში. 1920-1923წწ. სამეცნიერო მივლინებით იმყოფებოდა საზღვარგარეთ და მუშაობდა გრენობლში, პარიზში, ჰალეში. 1924 წლიდან მუშაობდა თბილისის სახელმწიფო უნივერსიტეტში, 1942-1945წწ. იყო მისი რექტორი. 1925 წელს დააარსა გეოლოგიური ინსტიტუტი და 1955 წლამდე იყო მისი დირექტორი. ამ ინსტიტუტს შემდგომ მისი სახელი ეწოდა. ა. ჯანელიძის აქტიური მონაწილეობით საქართველოში შეიქმნა გეოლოგიური საზოგადოება. ა. ჯანელიძის სამეცნიერო შრომები ძირითადად ეხება პალეონტოლოგიის, სტრატიგრაფიის, ტექტონიკისა და თეორიული გეოლოგიის საკითხებს. გამოკვლეული აქვს თბილისისა და მისი მიდამოების გეოლოგიური აგებულება, თანამედროვე გეოლოგიური პროცესები, ასევე მტკვრის ტერასები, ნატახტარის წყაროები და სხვ. შეისწავლა საქართველოს იურული და ცარცული პერიოდების, საფრანგეთის ადრინდელი ცარცული ეპოქის ფაუნა, აგრეთვე ურალის დასავლეთი კალთის დევონური პერიოდის მარჯნული ფაუნა. ავტორია უმაღლესი სკოლის სახელმძღვანელოებისა. საქართველოს სსრ მოწვევის უმაღლესი საბჭოს დეპუტატი და საქართველოს სსრ I-V მოწვევის უმაღლესი საბჭოს პრეზიდიუმის წევრი (1939-1963). 1982 წელს საქართველოს სსრ მეცნიერებათა აკადემიამ დააწესა ალექსანდრე ჯანელიძის სახელობის პრემია. გეოლოგიურ-მინერალოგიურ მეცნიერებათა დოქტორი (1923), პროფესორი (1925).

წყარო: ქართული საბჭოთა ენციკლოპედია: ტ. 11.-თბ.,1987.- გვ.538-539

• საქართველოს გეოლოგიური საზოგადოება, თავმჯდომარე (1937-1978)
• საქართველოს მეცნიერებათა აკადემია, აკადემიკოსი (1941-1975)

• 1946 - საქართველოს მეცნიერებათა დამსახურებული მოღვაწე
• შრომის წითელი დროშის ორდენი (2 ორდენი)
• ლენინის ორდენი

• ზოგადი გეოლოგიის მოკლე კურსი : სახელმძღვ. სტუდენტებისათვის (ავტორი). - თბილისი, თბილ. უნ-ტის გამ-ბა, 1972. - 466გვ.
• ისტორიული გეოლოგიის მოკლე კურსი (ავტორი). - თბილისი, ცოდნა, 1963. - 400გვ.
• ნარკვევები გეოლოგიის ისტორიიდან (ავტორი). - თბილისი, თბილ. უნ-ტის გამ-ბა, 1959. - 398გვ.
• კონტინენტები და მათი წარმოშობა (ავტორი). - თბილისი, საქ. სსრ მეცნ. აკად. გამ-ბა, 1955. - 98გვ.
• გეოლოგია თბილისის უნივერსიტეტში (ავტორი) // საქართველოს გეოლოგიური ინსტიტუტის მოამბე ; ტ. III. ნაკვ. II. - თბილისი, თბ. სახ. უნტის. გეოლოგ. ინსტ. გამოცემა, 1938. - გვ.97-189
• კავკასიის გეოლოგია (ავტორი). - ტფილისი, სამთო-ქიმ. ინს-ტის ტეხნ. დაუფლ. საზ-ბის გა-მა, 1933. - 95გვ.