ვასილ ცომაია

დაბადების ადგილი: სოფელი პატარა კვათანა, აბაშის რაიონი. 

1938 წლიდან სწავლობდა თბილისის სახელმწიფო უნივერსიტეტის გეოგრაფია-გეოლოგიის ფაკულტეტზე ჰიდროლოგიის სპეციალობაზე, საიდანაც 1941 წელს გაიწვიეს წითელი არმიის რიგებში; 1942 წელს დაამთავრა ბაქოს საზენიტო-საარტილერიო სასწავლებელი. ომის პერიოდში მსახურობდა კრასნოვოდსკის, ასტრახანის და გომელის სამხედრო ნაწილებში; 1945 წელს დემობილიზებულ იქნა და სწავლა გააგრძელა თბილისის სახელმწიფო უნივერსიტეტში, რომელიც დაამთავრა 1948 წელს. უნივერსიტეტის დამთავრების შემდეგ მუშაობა დაიწყო თბილისის გეოფიზიკური ობსერვატორიის ჰიდროლოგიურ განყოფილებაში ჯერ ტექნიკოსად, შემდეგ განყოფილების უფროსად; 1953 წლიდან მუშაობდა ჰიდრომეტეოროლოგიის ინსტიტუტში: უმცროსი მეცნიერ-თანამშრომელი, უფროსი მეცნიერ-თანამშრომელი, ჰიდროპროგნოზების და გლაციოლოგიის სექტორის, ჰიდროლოგიური განყოფილების უფროსი, ლაბორატორიისა და სექტორის გამგე. შეთავსებით სხვადასხვა წლებში მუშაობდა თბილისის სახელმწიფო უნივერსიტეტის გეოგრაფია-გეოლოგიის ფაკულტეტზე; სულხან-საბა ორბელიანის სახელობის სახელმწიფო პედაგოგიური უნივერსიტეტის საბუნებისმეტყველო ფაკულტეტზე დოცენტად და პროფესორად. გამოქვეყნებული აქვს 165 ნაშრომი. არის 6 კრებულის და 1 მონოგრაფიის რედაქტორი. მიღებული აქვს სახელმწიფო ჯილდოები. მიღებული აქვს სსრკ გეოგრაფიული საზოგადოების საპატიო დიპლომი (1984), თბილისის სახელმწიფო უნივერსიტეტის სამეცნიერო პრემია ნაშრომისათვის "კოლხეთის დაბლობი: ბუნებრივი პირობები და სოციალურ–ეკონომიკური ასპექტი" (1993). საქართველოს ჰიდრომეტეოროლოგიური ინსტიტუტის წყლის რესურსებისა და ჰიდროლო­გიური პროგნოზების განყოფილების მთავარი მეცნიერ-თანა­მშრომელი,გეოგრაფიულ მეცნიერებათა დოქტორი, პროფესორი (2002).

საკანდიდატო დისერტაციის თემა - "თოვლის დაგროვება საქართველოს მდინარეების წყალშემკრებ აუზებში და მისი რეჟიმების პარამეტრების განსაზღვრა", დაიცვა 1956 წელს; სადოქტორო დისერტაციის თემა - "მთიან რეგიონებში თოვლდაგროვების კანონზომიერებათა გლაციოლოგიური და ჰიდროლოგიური საფუძვლები (საქართველოს მაგალითზე)", დაიცვა 1996 წელს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.286-287; წიგნი ღირსებისა: ტ. 5/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2003. - გვ.214

• საქართველოს გეოგრაფიული საზოგადოება, ერთ-ერთი დამფუძნებელი და სამეცნიერო საბჭოს წევრი
• საქართველოს ეკოლოგიურ მეცნიერებათა აკადემია, აკადემიკოსი (2000-)
• ფაზისის საერო აკადემია, აკადემიკოსი (2002-)

• 2000 - ღირსების ორდენი
• 2000 - ღირსების მედალი

• კატასტროფული წყალდიდობები, ღვარცოფები და თოვლის ზვავები საქართველოში და მათი უსაფრთხოება : მონოგრაფია (თანაავტორი). - თბილისი, ტექნ. უნ-ტი, 2012. - 244გვ.. - ISBN: 9789941201202
• ნაზღვლევი წყალდიდობები და წყალმოვარდნები საქართველოში (თანაავტორი). - თბილისი, ჰიდრომეტეოროლოგიის ინ-ტი, 2009. - 134გვ.. - ISBN: 978-9941-0-1951-7
• ჭაღარა კავკასიონის ახალგაზრდობის ხანა (ავტორი). - თბილისი, მეცნიერება, 1985. - 44გვ.