ბიჭიკო აბაშიძე

დაბადების ადგილი: სოფელი ქვედა საზანო, ზესტაფონის რაიონი.

სიმღერა–გალობას სწავლობდა ქუთაისის გიმნაზიაში ბართლომე კუხიანიძის ხელმძღვანელობით; 1918 წლიდან კი ზესტაფონის ახლადგახსნილ გიმნაზიაში გადმოიყვანეს, სადაც გიმნაზიის გუნდში მღეროდა; 1923 წლიდან ის ჭიათურაში მუშაობდა და თან სანდრო კავსაძის გუნდში მღეროდა; ხუთ წელიწადში ისწავლა მრავალი სიმღერა და დაეუფლა საგუნდო-სალოტბარო ხელოვნებას; 20-იანი წლების ბოლოს პირველი დამოუკიდებელი გუნდი შექმნა ჭიათურის რაიონის სოფელ დიდ რგანში; 1928–1938წწ. ხელმძღვანელობდა რაიონულ თვითმოქმედ გუნდებს; 1930 წელს მერელისის გრეხილი ავეჯის ფაბრიკაში ჩამოაყალიბა გუნდი, რომელიც ძირითადად ასრულებდა ზემოიმერულ სიმღერებს; ასევე ჩამოაყალიბა გუნდები ხარაგაულში; 1938 წელს სათავეში ჩაუდგა ორჯონიკიძის(ამჟამად ხარაგაულის) სიმღერისა და ცეკვის სახელმწიფო ანსამბლს; 1941 წლიდან გარდაცვალებამდე იყო ხარაგაულის კულტურის სახლის დირექტორი; 1966 წელს ხარაგაულის ხალხური ცეკვისა და სიმღერის 68 კაციანი ანსამბლი პირველად საბჭოთა კავშირის გარეთ, პოლონეთის ფესტივალზე გაიყვანა, მაშინ ხარაგაულის ანსამბლი სახელმწიფო ანსამბლის სახელით სარგებლობდა; მას დამსახურება მიუძღვის ქართული ხალხური სიმღერების დამუშავებაში: "იმერული მგზავრული", "ადილა", "სადღესასწაულო", "იმერული ცხენოსნური", "სუფრული"; მისი შესრულებით სიმღერები ჩაწერეს – გ. კოკელაძემ, მ. ჩირინაშვილმა, ჩანაწერები დაცულია საქრთველოს სახელმწიფო ხელნაწერთა ფონდში; მისი აღზრდილი ლოტბარები არიან: გ. ბუაჩიძე, მ.კამკამიძე, ლ. ლურსმანაშვილი, პ. სახვაძე, ს. ციმაკურიძე; ლოტბარი.

წყარო: ქართული მუსიკის ენციკლოპედიური ლექსიკონი. – თბ., 2015. – გვ. 7 ; ინტერნეტ გვერდი -ხარაგაული და ხარაგაულელები: kharagauli.ucoz.com

• 1951 - საქართველოს ხელოვნების დამსახურებული მოღვაწე