ირაკლი შუშანია

დაბადების ადგილი: ქ. თბილისი.

1951 წელს თბილისის სამედიცინო ინსტიტუტის დამთავრების შემდეგ მუშაობდა ექიმად, პარალელურად სწავლობდა, ვანო სარაჯიშვილის სახ. თბილისის სახელმწიფო კონსერვატორიაში, რომელიც დაამთავრა 1955 წელს.

კონსერვატორიის დამთავრებისთანავე ჩაირიცხა ზ. ფალიაშვილის სახ. თბილისის ოპერისა და ბალეტის სახელმწიფო თეატრის სოლისტად (ბანი). იგი მრავალი წლის მანძილზე უძღვებოდა ვოკალის კლასს შ. რუსთაველის სახ. სახელმწიფო თეატრალურ ინსტიტუტში. შესანიშნავი ვოკალურ–სცენური მონაცემების წყალობით შექმნა დასამახსოვრებელი სახეები, იგი ერთნაირი წარმატებით განასახიერებდა როგორც კომიკურ, ისე ჰეროიკულ სახეებს. შეასრულა შემდეგი პარტიები: ცანგალა (ზ. ფალიაშვილის "დაისი"), მეფე გიორგი (მ. ბალანჩივაძის "დარეჯან ცბიერი"), ხუტა, კაც ზვამბაია (ო. თაქთაქიშვილის "პირველი სიყვარული", "მთვარის მოტაცება"), შერგილი (რ. ლაღიძის "ლელა"), ბორის გოდუნოვი და ვარლამი (მ. მუსორგსკის "ბორის გოდუნოვი"), მეწისქვილე (ა. დარგომიჟსკის "ალი"), ტკაჩენკო (ს. პროკოფიევის "სემიონ კოტკო"),  გრემინი, მეფე რენე (პ. ჩაიკოვსკის "ევგენი ონეგინი", "იოლანტა"), დონ ბაზილიო (ჯ. როსინის "სევილიელი დალაქი"), მეფისტოფელი (შ. გუნოს "ფაუსტი"), ლეპორელო (ვ. მოცარტის "დონ ჟუანი"), ქურუმი (ჯ. ვერდი "აიდა") და სხვა. ი. შუშანიას შემოქმედების ერთ-ერთი მნიშვნელოვანი მხარე იყო საკონცერტო მოღვაწეობა. 1964 წელს კონცერტები გამართა გერმანიის დემოკრატიულ რესპუბლიკასა და ჩეხოსლოვაკიაში. 1969 წელს საოპერო თეატრთან ერთად იმყოფებოდა პოლონეთის ქალაქ ლოძში. სხვადასხვა წელს საგასტროლოდ იმყოფებოდა: მოსკოვში, ლენინგრადში, ტაშკენტში, ვლადივოსტოკში, ნოვოსიბირსკში, მაგადანსა და სახალინზე, კამჩატკაზე, პერმსა და სხვა.

წყარო: მუსიკის ენციკლოპედიური ლექსიკონი. – თბ., 2007. – გვ. 318; 2007 წლის საიუბილეო თარიღები: თეატრი, მუსიკა, კინო, ქორეოგრაფია.- თბ., 2007.- გვ.54

• 1967 - საქართველოს სახალხო არტისტი
• 1961 - საქართველოს დამსახურებული არტისტი